یمن میں داعش کا دہشت گردی فورس کے ہیڈ کوارٹر پر حملہ،19ہلاک

صنعا: (ایجنسی)یمن کے شہر عدن میں انسدادِ دہشت گردی فورس کے ہیڈ کوارٹر پر داعش کے حملے میں 10 اہلکاروں سمیت 19 افراد ہلاک ہوگئے۔غیرملکی خبررساں ادارے کے مطابق یمن کے شہر عدن میں دو کار بم دھماکوں میں 19 افراد ہلاک جب کہ 40 سے زائد زخمی ہوگئے ہیں۔
عدن کے سیکیورٹی حکام نے حملوں کی تصدیق کرتے ہوئے بیان جاری کیا ہے کہ دو کاروں میں موجود 6 مسلح حملہ آوروں نے انسداد دہشت گردی فورس کے ہیڈ کوارٹر پر حملہ کیا۔
سیکورٹی اہلکاروں نے حملہ آوروں کو روکنے کی کوشش کی اور فائرنگ کا تبادلہ بھی ہوا جس میں 4 اہلکار اور گاڑیوں میں موجود 6 مسلح دہشت گرد ہلاک ہوگئے تاہم باقی حملہ آور پولیس اور فوج کا سیکیورٹی حصار توڑ کر مرکزی دروازے تک پہنچنے میں کامیاب ہوگئے۔حکام کے مطابق حملہ آوروں نے ہیڈ کوارٹر کے مرکزی دروازے پر پہنچتے ہی دھماکا خیز مواد سے بھری 2 گاڑیوں کو اڑا دیا جس کے نتیجے میں مزید 9 افراد ہلاک ہوگئے جن میں 3 فوجی بھی شامل ہیں۔
دھماکے اس قدر شدید تھے کہ کالونی کی متعدد عمارتوں کے شیشے ٹوٹ گئے اور درجنوں گاڑیوں کو بھی شدید نقصان پہنچا۔حملے کی ذمہ داری شدت پسند تنظیم داعش نے قبول کرلی ہے اور بیان جاری کیا ہے کہ یہ دونوں حملے انسدادِ دہشت گردی فورس کے ہیڈ کوارٹر کو تباہ کرنے کے لئے کئے گئے تھے۔

Title: yemen attack at least 14 killed in raid on aden counter terrorism headquarters | In Category: دنیا  ( world )

Leave a Reply