سنگا پور کا پاسپورٹ دنیا کا سب سے زیادہ طاقتور پاسپورٹ بن گیا

سنگاپور: پراگے کی جانب سے سنگا پوری شہریوں کے لیے ویزا پابندیاں ہٹانے کے فیصلے سے سنگاپور کا پاسپورٹ اب دنیا میں طاقتور ترین پاسپورٹ بن گیا اور اس کے ساتھ ہی یہ اعزاز پانے والا پہلا ایشیائی ملک بھی بن گیا ہے۔کسی بھی ملک کی اہمیت اور طاقت کا اندازہ لگانے کے لیے ایک اہم بات یہ دیکھی جاتی ہے کہ اس کا باشندہ کتنے ممالک میں بغیر ویزے کے جاسکتا ہے۔ اس سے قبل اس میں سرفہرست رہنے کا اعزاز صرف یورپی ممالک کو ہی حاصل رہا ہے لیکن تاریخ میں پہلی مرتبہ کوئی ایشیائی ملک یہ اعزاز حاصل کرنے میں کا میاب ہوا ہے۔
سنگاپور کے باشندے اب 159 ممالک میں بغیر ویزے کے دورہ کر سکتے ہیں۔پاسپورٹ انڈیکس رینکنگ کی عالمی ویب سائٹ کے مطابق گزشتہ 2 سال تک جرمنی کو دنیا کا طاقتور پاسپورٹ رکھنے کا اعزاز حاصل تھا مگر اب سنگاپور نے صرف ایک پوائنٹ سے جرمنی سے یہ اعزاز چھینتے ہوئے اسے نیچے دھکیل دیا ہے ۔
جرمنی 158 پوائنٹس کے ساتھ دوسرے نمبر پر موجود ہے۔دنیا میں طاقتور پاسپورٹس رکھنے والے ممالک میں جرمنی کے بعد سوئیڈن اور جنوبی کوریا 157،157 کے ساتھ تیسرے جب کہ ڈنمارک، فن لینڈ، اٹلی، فرانس، اسپین، ناروے، جاپان، برطانیہ 156 پوائنٹس کے ساتھ چوتھے نمبر پر موجود ہیں۔ لگسمبرگ، سوئٹزرلینڈ، نیدرلینڈ، بیلجیئم، آسٹریا اور پرتگال 155 پوائنٹس کے ساتھ پانچویں نمبر پر ہیں۔ادھر امریکی صدر ڈونلڈ ٹرمپ کے صدر بننے کے بعد امریکی پاسپورٹ دن بدن نیچے آرہا ہے اور امریکی شہری اب 154 ممالک میں بغیر ویزے کے جاسکتے ہیں جب کہ امریکا کے ساتھ چھٹے نمبر پر ملائیشیا، آئرلینڈ اور کینیڈا موجود ہیں۔
اس فہرست میں ہندوستان کا 75واں نمبر ہے ۔دوسری جانب سنگاپور کے حکام کا کہنا ہے کہ یہ ہمارے لیے اعزاز کی بات ہے کہ ایشیائی ملک طاقتور پاسپورٹ رکھنے والے ممالک میں سرفہرست ہوا اور یہ سنگاپور کے سفارتی تعلقات اور موثر غیر ملکی پالیسی کا نتیجہ ہے۔واضح رہے افغانستان کا شمار دنیا میں کمزور ترین پاسپورٹ رکھنے والے ممالک میں ہوتا ہے اور اس کے شہری صرف 22 ممالک میں بغیر ویزا کے سفر کرسکتے ہیں جب کہ اس کے بعد پاکستان کا نمبر آتا ہے جس کا ویزہ اسکور 26 ہے۔

Read all Latest world news in Urdu at urdutahzeeb.com. Stay updated with us for Daily urdu news from world and more news in Urdu. Like and follow us on Facebook

Title: Singapore passport now worlds most powerful in Urdu | In Category: دنیا World Urdu News

Leave a Reply