مصر میں 15 دہشت گردوں کو پھانسی دی گئی

قاہرہ:(ایجنسی) مصر میں سیکیورٹی فورسز پر حملوں میں ملوث 15 دہشت گردوں کو پھانسی دے دی گئی۔مصری میڈیا کے مطابق تمام مجرموں کو پھانسی مختلف جیلوں میں دی گئی، یہ تمام مجرم 2013میں مصر کے شہر سینائی میں اہلکاروں کے قتل، اقدام قتل، فوجی گاڑیوں کوحملوں میں تباہ کرنے اور دیگر سنگین جرائم میں ملوث تھے۔ایک ہی وقت میں پھانسیاں دینے کا یہ سب سے بڑا واقعہ ہے، قبل ازیں 2015 میں بیک وقت چھ جنگجوؤں کو پھانسی دی گئی تھی۔
خیال رہے کہ مصری شہر سینائی میں گزشتہ کئی برس سے حکومت کو بغاوت کا سامنا ہے، داعش (دولت اسلامیہ عراق و شام ) اور دیگر شدت پسندوں کی جانب سے فوجی، پولیس اور ججز پر متعدد حملے کیے گئے۔ گزشتہ ہفتے سینائی پورٹ پر داعش نے اینٹی ٹینک میزائل فائر کرکے زمین پر موجود ایک فوجی ہیلی کاپٹر کو تباہ کردیا تھا حملے میں ایک فوجی افسر ہلاک جب کہ دو زخمی ہوگئے تھے۔
نومبر میں داعش کے شدت پسندوں نے شمالی سینائی میں واقع ایک مسجد پر حملہ کرکے بم دھماکوں اور فائرنگ کے ذریعے 250 نمازیوں کو شہید کردیا تھا جس کے بعد مصری صدر عبدالفتح السیسی نے اپنی فوج کو تین ماہ کے اندر سینائی سے شدت پسندوں کا خاتمہ کرنے کی ڈیڈ لائن دی ہے اور ہدایت دی ہے کہ شدت پسندوں کے خلاف طاقت کا بھرپور استعمال کیا جائے۔

Title: egypt hangs 15 for terrorism | In Category: دنیا  ( world )

Leave a Reply