دہلی یونیورسٹی میں زیر تعلیم زخمی کشمیر ی طالبعلم کی ہلاکت سے کشمیر میں ہلاک شدگان کی تعداد 31ہو گئی

سری نگر:کشیدگی کی شکار وادی کشمیر میں موت کا رقص جاری ہے اور منگل کو دہلی یونیورسٹی میں زیر تعلیم ایک جواں سال طالبعلم کے زخموں کی تاب نہ لاکر چل بسنے سے مرنے والوں کی تعداد بڑھ کر 31 ہوگئی ہے۔
اِن میں سے 30 ہلاکتیں جنوبی کشمیر جبکہ ایک ہلاکت گرمائی دارالحکومت سری نگر میں ہوئی ہے۔ ہلاک شدگان میں ایک پولیس ڈرائیور بھی شامل ہے۔ پرتشدد احتجاجی مظاہروں میں زخمی ہونے والوں کی تعداد 500 کے قریب پہنچ گئی ہے۔ اِن میں سیکورٹی فورسز اور ریاستی پولیس کے اہلکار بھی شامل ہیں۔ زخمیوں میں سے قریب 60 شہریوں کو گولیوں کے زخم آئے ہیں جبکہ قریب ایک درجن افراد کو بندوق کی گولی کے زخم لگے ہیں جن میں سے قریب دو درجن کی حالت اسپتالوں میں تشویشناک بتائی جاتی ہے۔
واضح رہے کہ وادی میں 8 جولائی کو حزب المجاہدین (ایچ ایم) کے اعلیٰ کمانڈر برہان وانی کی ہلاکت کے بعد تشدد کی ایسی لہر آئی جو تاحال تھمنے کا نام ہی نہیں لے رہی ہے۔ پیدا شدہ کشیدہ صورتحال پر قابو پانے کے لئے تاحال سینٹرل ریزرو پولیس فورس (سی آر پی ایف) کی قریب 20 کمپنیاں( 2 ہزار اہلکار) یہاں بھیجی جاچکی ہیں۔ذرائع نے بتایا کہ جنوبی ضلع اننت ناگ کے بج بہاڑہ میں گذشتہ شام تین افراد ا±س وقت زخمی ہوگئے جب سیکورٹی فورسز نے احتجاجی مظاہرین کو منتشر کرنے کے لیے فائرنگ کی۔ انہوں نے بتایا کہ زخمیوں کو پہلے مقامی اسپتال اور بعد میں سری نگر کے صدر اسپتال منتقل کیا گیا جہاں عامر نذیر لتو نامی ایک جواں سال نوجوان زخموں کی تاب نہ لاکر دم توڑ گیا۔ ذرائع نے مزید بتایا کہ گولیاں عامر کے سینے میں پیوست ہوئی تھیں۔
بتایا جارہا ہے عامر دہلی یونیورسٹی سے کامرس میں ماسٹرس ڈگری (ایم کام) کررہا تھا اور چند دن قبل ہی تعطیلات پر وادی آیاتھا۔ عامر کی نماز جنازہ بج بہاڑہ کی شہید پارک میں پڑھی گئی جس میں کرفیو کی خلاف ورزی کرتے ہوئے ہزاروں افرادنے شرکت کی۔ وادی کے اسپتالوں میں میڈیکل ایمرجنسی نافذ ہے جبکہ طبی عملے کی چھٹیاں منسوخ کر دی گئی ہیں۔ وادی کے بیشتر علاقوں میں کرفیو بدستور نافذ ہے۔ وادی اور خطہ جموں میں انٹرنیٹ خدمات اور شمالی کشمیر کے ضلع بارہمولہ سے جموں خطہ کے بانہال تک چلنے والی ریل سروس بھی بدستور معطل ہے۔ وادی میں 10 جولائی کی شام سے 11 جولائی کی شام تک 9 افراد زخموں کی تاب نہ لاکر چل بسے تھے۔
اِن میں سے سب سے زیادہ چھ کا تعلق ضلع کولگام سے تھا۔ اِن کی شناخت یاسمینہ، فیروز احمد، شاہد حسین بٹ، زبیر کھانڈے، نذیر احمد شیخ اور مشاق احمد ساکنان ضلع کولگام جبکہ شاہد گلزار ساکنہ شوپیان، عبدالرشید ساکنہ پلوامہ اور بلال احمد شاہ ساکنہ اننت کی حیثیت سے کی گئی تھی۔ جبکہ9 اور 10 جولائی کو سیکورٹی فورسز کی کاروائی میں ہلاک ہونے والے 21 نوجوانوں کی شناخت ثاقت منظور میر ساکنہ کھندرو اچھہ بل، خورشید احمد بٹ ساکنہ ہروت کولگام، سفیر احمد بٹ ساکنہ چراری گام اننت ناگ، عادل بشیر ساکنہ ڈورو اننت ناگ، عبدالحمید موچی ساکنہ آرونی کولگام، دانش یعقوب شاہ ساکنہ اچھہ بل اننت ناگ، جہانگیر احمد گنائی ساکنہ حسن پورہ بج بہاڑہ اننت ناگ، شوکت احمد میر ساکنہ حسن پورہ بج بہاڑہ اننت ناگ، آزاد حسین ساکنہ شوپیان، اعجاز احمد ٹھوکر ساکنہ سلہ گام سیر ہمدان اننت ناگ، محمد اشرف ڈار ہل پورہ کوکرناگ اننت ناگ، حسیب احمد گنائی ساکنہ بتہ پورہ کھنہ بل، امتیاز احمد منڈو ولد محمد شفیع ساکنہ منڈ پورہ کھنہ بل اننت ناگ، معشوق احمد ساکنہ کنڈ قاضی کولگام، محمد الطاف راتھر ساکنہ راجپورہ پلوامہ، فیاض احمد میر ساکنہ لتر پلوامہ، عرفان احمد ملک ساکنہ ورون نیوہ پلوامہ، گلزار احمد پنڈت ساکنہ موہن پورہ شوپیان، شبیر احمد میر ساکنہ ٹینگ پورہ بائی پاس سری نگر، فیروز احمد (پولیس اہلکار)، زبیر احمد ساکنہ کیموہ کولگام کی حیثیت سے کی گئی تھی۔دریں اثنا ریاستی وزیر اعلیٰ محبوبہ مفتی نے کل ایک بار پھر وادی میں امن کی بحالی اور جان و مال کے نقصان کو روکنے کے لئے عوام سے تعاون کرنے کہا۔
انہوں نے کہا کہ حکومت امن کی بحالی کے لئے ہر ممکن اقدامات کررہی ہے تاہم اس ضمن میں لوگوں کے تعاون کی ضرورت ہے۔ وہ یہاں اپنے پرائیویٹ آفس میں سول سوسائٹی کے نمائندوں اور معزز شہریوں کے ساتھ بات چیت کررہی تھیں۔ محترمہ مفتی نے کہا ہے ’ میں سماج کے ہر طبقے کے لوگوں بشمول سیاسی لیڈروں، مذہبی رہنماوں اور معزز شہریوں سے اپیل کرتی ہوں کہ وہ موجودہ حالات کے تناظر میں آگے آکر امن کی بحالی میں حکومت کی مدد کریں‘۔
انہوں نے دوران بات چیت کہا ہے کہ پولیس اور سیکورٹی فورسز کو صبر و تحمل برتنے کی ہدایت دی گئی ہے تاکہ انسانی جانوں کے زیاں کو روکا جاسکے۔محترمہ مفتی نے کہا کہ ہمارے نوجوان کی ایک نسل پہلے ہی تشدد کی بھینٹ چڑھی ہے اور اب اس سلسلے کو برداشت نہیں کیا جائے گا۔انہوں نے مزید کہا ہے کہ بدقسمتی سے کچھ لوگ یہاں کے نوجوانوں کی زندگیوں کے ساتھ کھلواڑ کرتے ہیں اور انہیں تشدد پر آمادہ کرتے ہیں۔ (یو ا ین آئی)

Read all Latest kashmir news in Urdu at urdutahzeeb.com. Stay updated with us for Daily urdu news from kashmir and more news in Urdu. Like and follow us on Facebook

Title: One more youth succumbs death toll 31 in Urdu | In Category: کشمیر Kashmir Urdu News

Leave a Reply