لشکر طیبہ کے ابو دوجانہ کی ہلاکت کے بعد جھڑپیں ، فائرنگ،ایک غیر فوجی ہلاک

سری نگر: جنوبی کشمیر میں سیکورٹی فورسز کے ساتھ مسلح تصادم میں لشکر طیبہ کے ڈویژنل کمانڈر ابو دوجانہ کی ہلاکت کے خلاف بڑے پیمانے پر احتجاجی مظاہرے شروع ہوگئے ہیں۔ اس دوران مسلح تصادم کے مقام ہاکری پورہ پلوامہ میں سیکورٹی فورسز کی احتجاجی مظاہرین پر فائرنگ کے نتیجے میں ایک عام شہری ہلاک جبکہ متعدد دیگر زخمی ہوئے ہیں۔
جنوبی کشمیر کے مختلف حصوں میں بھڑک اٹھنے والے احتجاجی مظاہروں کے دوران دوپہر بارہ بجے تک قریب ڈیڑھ درجن افراد کے زخمی ہونے کی اطلاعات ہیں۔ انتظامیہ نے سوشل میڈیا پر افواہ بازی کو روکنے کے لئے پورے ضلع پلوامہ میں ہر طرح کی انٹرنیٹ خدمات احتیاطی اقدام کے طور پر منقطع کردی ہے۔ جنوبی کشمیر سے موصولہ اطلاعات کے مطابق مسلح تصادم میں ابو دوجانہ کی ہلاکت کی خبر پھیلنے کے بعد ضلع پلوامہ کے متعدد دیہات کے رہائشیوں نے ہاکری پورہ کا رخ کیا۔ تاہم جب سیکورٹی فورسز نے احتجاجیوں کا راستہ روکا تو وہ مشتعل ہوئے اور سیکورٹی فورسز پر پتھراو¿ کرنے لگے۔
..سیکورٹی فورسز نے احتجاجی مظاہرین کو منتشر کرنے کے لئے پہلے آنسو گیس اور بعدازاں مبینہ طور پر براہ راست فائرنگ اور پیلٹ بندوقوں کا استعمال کیا جس کے نتیجے میں متعدد مظاہرین زخمی ہوگئے۔ سیکورٹی فورسز کی کاروائی میں فردوس احمد خان نامی نوجوان سینے میں گولی لگنے سے شدید زخمی ہوگیا۔ سرکاری ذرائع نے بتایا کہ اگرچہ زخمی فردوس کو فوری طور پر ضلع اسپتال پلوامہ منتقل کیا گیا، تاہم اسے وہاں مردہ قرار دیا گیا۔ مہلوک نوجوان بیگم باغ کاکہ پورہ کا رہنے والا تھا۔
سیکورٹی ذرائع نے بتایا کہ جنوبی کشمیر میں ابو دوجانہ کی ہلاکت کے بعد پیدا شدہ صورتحال سے نمٹنے کے لئے سیکورٹی فورسز کی اضافی نفری تعینات کر دی گئی ہے۔ ابو دوجانہ کی ہلاکت کے خلاف وادی کے مختلف تعلیمی اداروں میں بھی احتجاجی مظاہرے بھڑک اٹھے ہیں۔ خیال رہے کہ ضلع پلوامہ میں انتہا پسندوں اور سیکورٹی فورسز کے درمیان رات بھر چلے مسلح تصادم میں لشکر طیبہ کے ڈویژنل کمانڈر یا کشمیر چیف ابو دوجانہ سمیت 2 انتہاپسند ہلاک ہو گئے۔ شمالی پاکستان کے گلگت بلتستان کا رہنے والا ابودوجانہ عرف حفیظ گذشتہ کئی برسوں سے جنوبی کشمیر میں سرگرم تھا اور متعدد مرتبہ سیکورٹی فورسز کو چکمہ دیکر فرار ہونے میں کامیاب رہا۔ سیکورٹی ایجنسیوں نے ابو دوجانہ کے سر پر 15 لاکھ روپے کا انعام مقرر کیا تھا۔

Read all Latest kashmir news in Urdu at urdutahzeeb.com. Stay updated with us for Daily urdu news from kashmir and more news in Urdu. Like and follow us on Facebook

Title: Clashes in kashmir after pulwama encounter 1 civilian dead internet services shut in Urdu | In Category: کشمیر Kashmir Urdu News

Leave a Reply