جی ایس ٹی نافذ ہونے مہنگائی نہیں بڑھے گی ،ٹیکس بھی کم ہوں گے : وزیر مالیات

نئی دہلی :مرکزی وزیر خزانہ ارون جیٹلی نے کہا ہے کہ پورے ملک میں ٹیکس کا ایک یکساں بالواسطہ ٹیکس نظام بنانے اور ملک کو ایک بازار بنانے کے مقصد سے اشیا اور سروس ٹیکس (جی ایس ٹی )کے نافذ ہونے سے مہنگائی نہیں بڑھے گی اور رفتہ رفتہ ٹیکس کی شرح بھی کم ہوں گی۔
مسٹر جیٹلی نے اشیا اور سروس ٹیکس (جی ایس ٹی )کو نافذ کرنے کے لئے ضروری 122ویں آئینی اور ترمیمی بل کے کل رات راجیہ سبھا میں متفقہ طور پر منظور کئے جانے کے بعدیہاں نامہ نگاروں سے کہا کہ ”ملک میں بالواسطہ ٹیکس اصلاحات کی سمت میں بدھ کا دن تاریخی تھا جب ہندوستانی سیاست کی پختگی دیکھنے کو ملی۔
ایک جماعت اے آئی اے ڈی ایم کے کو چھوڑکر سبھی پارٹیوں نے متفقہ طور پر اس بل کی حمایت کی۔“ انہوں نے کہا کہ اس بل میں کچھ ترمیم کئے جانے کے پیش نظر اسے پھر سے لوک سبھا میں پیش کیا جانا ہے اور اس کےلئے لوک سبھا کو نوٹس دیا گیا ہے۔
انہوں نے کہا کہ 50فیصد ریاستی اسمبلیوں سے اس بل کو منظوری ملنے سے پارلیمنٹ کے آئندہ اجلاس میں مرکزی جی ایس ٹی اور بین ریاستی جی ایس ٹی بل پیش کرنے کی پوری کوشش کی جائے گی۔ مرکزی جی ایس ٹی اور بین ریاستی جی ایس ٹی بلوں کو مالی بل کے طور پر پیش کئے جانے سے متعلق سوال پر انہوں نے کہا کہ ان بلوں کو جی ایس ٹی کونسل تیار کرے گی اور بلوں کو آئین کے تحت پیش کیا جائے گا۔
مسٹر جیٹلی نے جی ایس ٹی نافذ ہونے سے مہنگائی بڑھنے کے خدشات کو خارج کرتے ہوئے کہا کہ صارفین قیمت انڈیکس میں شامل زیادہ تر کھانےکی اشیا ابھی ٹیکس کے دائرے سے باہر ہیں۔جی ایس ٹی میں بھی چھوٹ والی اشیا کی فہرست ہوگی جو مرکز اور ریاست مل کر تیار کریں گے۔

Read all Latest india news in Urdu at urdutahzeeb.com. Stay updated with us for Daily urdu news from india and more news in Urdu. Like and follow us on Facebook

Title: Once implemented gst will lower commodity prices arun jaitley in Urdu | In Category: ہندوستان India Urdu News

Leave a Reply